abbas-dana

Maut Ne Muskura Ke Puchha Hai

maut ne muskura ke puchha hai

zindagi ka mizaj kaisa hai

us ki ankhon men meri ghazlen hain

meri ghazlon men us ka chehra hai

us se puchho azaab raston ka

jis ka sathi safar men bichhda hai

chandni sirf hai fareb-e-nazar

chand ke ghar men bhi andhera hai

ishq men bhi maza hai jiine ka

gham uthane ka gar saliqa hai

chhod zakhmon pe tabsira karna

ab qalam se lahu tapakta hai

raushni ki zaban men ‘dana’

vo charaghon se baat karta hai

More Poems

Leave a Comment