Sufi Tabassum
bujhi bujhi si sitaron ki raushni hai abhi
ye raat kis ke isharon ko DhunDhti hai abhi
na jaane meri nazar hi nahin hai jalva-shanas
na jaane tere hi jalvon men kuchh kami hai abhi
kuchh aise gunjti hai dil men ahd-e-rafta ki yaad
ki jaise tu ne koi baat mujh se ki hai abhi
kisi ke husn se kheli hain umr bhar ankhen
ye lag raha hai nazar se nazar mili hai abhi
hazar qafile manzil pe ja ke lauT aa.e
miri nigah tiri raah DhunDhti hai abhi
sambhal to jaa.e tabi.at magar sitam ye hai
ki is ke ba.ad bhi ik aur zindagi hai abhi
Leave a Reply