Maut Ki Zad Ka KHatar Har Fard Ko Har Ghar Mein Hai

Josh Malsiani

maut ki zad ka ḳhatar har fard ko har ghar men hai

ye baḌa ik aib ai duniya tiri chausar men hai

manzil-e-maqsud par pahunche to pahunche kis tarah

DhunDne vaala umid-o-bim ke chakkar men hai

shaiḳh se kuchh zid nahin hai barhaman se kad nahin

dair o ka.aba donon ka jauhar mire saghar men hai

fikr-e-imroz o gham-e-farda sarasar be-mahal

tu agar ghar men hai to sab kuchh hamare ghar men hai

dam-ba-ḳhud fitne hain un ki shoḳhi-e-raftar se

ek sannaTe ka aalam arsa-e-mahshar men hai

meri hi rudad-e-vahshat sun ke fariyadi hain sab

chaak mere hi jigar ka daman-e-mahshar men hai

naqsh-e-ulfat miT gaya to dagh-e-ulfat hain bahut

shukr kar ai dil ki tere ghar ki daulat ghar men hai

is se kya matlab ki hai kis kis ke dil men shauq-e-qatl

dekhna ye hai ki dam kitna tire ḳhanjar men hai

silsila avargi ka fahm se bahar hai ‘josh’

main bhi chakkar men huun meri aql bhi chakkar men hai