koi taara kahin mahtab se milta-julta
yahi manzar hai mire ḳhvab se milta-julta
ghar muzayyan hai to phir sahn bhi ḳhali kyuun ho
kyuun nahin apne men ahbab se milta-julta
rau main bahta huun to hoti hai ragon men halchal
jaane kya mujh men hai sailab se milta-julta
qatra-e-surḳh men jab ḳhuun ki tasir nahin
kya hai phir jism men tezab se milta-julta
asman mujh se chhupata hai koi sachcha.i
ya koi vahm hai is ḳhvab se milta-julta
kis haqiqat ko chhupati hain nigahen ‘rahat’
ret hai ya ki sarab aab se milta-julta
Leave a Reply