Poet
maut bhi aati nahin hijr ke bimaron ko
kya musibat hai zara dekhna becharon ko
nala-e-dil ne hamare to asar kam na kiya
aur ma.azuri ziyada hui dil-daron ko
go hain jannat men maze lek nahin bhulne ka
honT ka chaTna tujh lab ke namak-ḳhvaron ko
is se behtar nahin kui chiiz siva bose ke
ru-numa.i men jo deven tire ruḳhsaron ko
kabhi rona kabhi sar dhunna kabhi chup rahna
kaam karne hain bahut se tire be-karon ko
main ne kaghaz tiri tasvir ka iisa ko diya
nusḳha juun dete hain bimar sab attaron ko
pattharon hi pe tajalli hai to ham ghairat se
ankhon hi men liye mar ja.enge nazzaron ko
sab namuna hai haqiqat ka jahan tak hai majaz
naas jo karte hain gulzaron ki divaron ko
ye ghazal ḳhidmat-e-navvab ki hai mir-‘raza’
aur ik dusri kah dijiye ham-karon ko
Leave a Reply