Rahat Hasan
mauj-o-girdab pe rakhta hai safina mera
us ko manzur na marna hai na jiina mera
mehr-e-afkar ki hoti hai navazish jab bhi
arz-e-qirtas pe girta hai pasina mera
mujh ko aata hai azabon ka izala karna
mom hai to kabhi faulad hai siina mera
ḳhadim-e-kucha-e-jan ye hai sadaqat meri
chand anfas muqarrar hai mahina mera
fasle ki nahin qaa.el hai mohabbat meri
sathiyo hai mire dil men hi madina mera
vo nahin gardish-e-ayyam ke dar pe ‘rahat’
dekhna hai use maqsud qarina mera
Leave a Reply