maslahat ke zaviyon se kis qadar anjan hai
a.inon ke biich men patthar bahut hairan hai
koi kyuun banta sar-e-mahfil tamasha sahibo
sar uTha kar bolna to bas meri pahchan hai
hamiyon ki bhiiḌ par is raaz ko ifsha karo
qafile ke muntashir hone ka bhi imkan hai
mera rona giḌgiḌana ra.egan sab ra.egan
aap ka ik muskurana da.imi farman hai
reḳhta ka ik naya majzub hai ‘shahpar’ rasul
shohrat us ke naam par ik nang hai bohtan hai
Leave a Reply