Obaidur Rahman
manzilen aur bhi hain vahm-o-guman se aage
ham ko karna hai safar qaid-e-makan se aage
paikar-e-sher ko malbus ata kya kiije
jab taḳhayyul ki ho parvaz bayan se aage
aab aur ḳhaak ki ye bazm hamen kya raas aati
ham ko jaana tha sitaron ke jahan se aage
kab talak dair-o-haram ki ye hadis-e-be-sud
mas.ale aur hain naqus-o-azan se aage
justuju aur hai kuchh ahl-e-junun ki varna
kaun karta hai safar ja-e-aman se aage
karb ko apne tamasha na banaya jaa.e
hai adab-gah-e-vafa ah-o-fughan se aage
nazr-e-andesha na ho jaa.e kahin ziist ‘obaid’
baat kuchh aur karen sud-o-ziyan se aage
Leave a Reply