Nazeer Akbarabadi
tumhare haath se kal ham bhi ro liye sahib
jigar ke daagh jo dhone the dho liye sahib
ghulam ashiq o chakar musahib o hamraz
gharaz jo tha hamen hona so ho liye sahib
qarar-o-sabr jo karne the kar chuke barbad
havas-o-hosh jo khone the kho liye sahib
hamare vazn-e-mohabbat men kuchh ho farq to ab
phir imtihan ki tarazu men tauliye sahib
kuchh intiha-e-buka ho to aur bhi yak-chand
sarishk-e-chashm se moti ko roliye sahib
kal us sanam ne kaha dekh kar hamen ḳhamosh
ki ab to aap bhi Tuk lab ko kholiye sahib
ye sun ke main ne ‘nazir’ us se yuun kaha hans kar
jo koi bole to albatta boliye sahib
Leave a Reply