manzil pahunch gaya huun main rasta kiye baghair
rusva kiya hai us ko tamasha kiye baghair
uupar se apni pyaas bujhata raha huun main
paani piya gilas ko jhuTa kiye baghair
aata hai is ada pe mujhe pyaar vo miri
har baat maan leta hai ghussa kiye baghair
vo aisi raushni hai ki jab bhi mujhe mile
khulti nahin hai mujh pe andhera kiye baghair
ik shaah baaj deta hai duuje ko vaise hi
vo meri dastaras men hai qabza kiye baghair
us chor par nazar main rakhun bhi to kis liye
jo haath aa gaya mire pichha kiye baghair
ab dil ki raushni hi karegi karishma kuchh
ḳhud ko ujala karna hai sho.ala kiye baghair
Leave a Reply