manzil na koi moḌ na rasta dikha.i de
aalam tamam dhund men lipTa dikha.i de
qatil dikha.i de na masiha dikha.i de
har shaḳhs ik fareb-e-tamasha dikha.i de
vaise to zindagi hai ujalon ka shahr bhi
dekho to maqbaron ka andhera dikha.i de
ja.un udhar to ek samundar hai be-karan
dekho idhar to pyaas ka sahra dikha.i de
rangin hai qatl-e-gul se abhi daman-e-bahar
dast-e-havas se ḳhuun Tapakta dikha.i de
tahtush-shu.ur men hai jo ik lamha-e-ḳhyal
lafzon ki siḌhiyon se utarta dikha.i de
sunta huun sa.aton men nigar-e-sahar ki chaap
manzar naqab-e-sham ulaTta dikha.i de
DhunDo kisi hasin ḳharabe men zindagi
ye dil to sadhuon ka basera dikha.i de
arz-e-dakan men baat chali hai kuchh is tarah
‘saqib’ dayar-e-sher men tanha dikha.i de
Leave a Reply