manzar hai abhi duur zara hadd-e-nazar se
saughat-e-safar aur hai asbab-e-safar se
tum mere taaqub ka tasavvur bhi na karna
puchho miri manzil mire tuute hue par se
main shar ki shararat se to hoshyar huun lekin
allah bachae to bachun khair ke shar se
barish ne miri tuuti hui chhat nahin dekhi
angan men lagi aag to badal nahin barse
patthar na bana de mujhe mausam ki ye sakhti
mar jaaen mire khvab na taabir ke dar se
dhul jaata hai sab dard miri ruuh ka is men
rahmat jo barasti hai mire dida-e-tar se
tanhai-pasandi miri fitrat ka bhi juz tha
mausam bhi ye kahta hai nikalna nahin ghar se
insan koi ho to main taaviz bana luun
duniya miri bad-tar hui bhuton ke khandar se
‘pinhan’ miri ghazlon ko bahut naaz hai us par
tasir ki daulat jo mili dast-e-hunar se
Leave a Reply