Mani-Taraaz-E-Ishq Har Ek Baada-Khwar Tha

maani-taraz-e-ishq har ik bada-khvar tha

is mai-kade men mast jo tha hoshiyar tha

tamhid thi junun ki gareban hua jo chaak

yaani ye khair-maqdam-e-fasl-e-bahar tha

banne lage hain daagh sitare khusha-nasib

tarik asman-e-shab-e-intizar tha

the zindagi ke saath mohabbat ke karobar

akhir kisi ke dar pe hamara mazar tha

marne pe bhi kata na azab-e-gham-e-firaq

kunj-e-lahad khulasa-e-shab-ha-e-tar tha

aghaz-e-ishq hi men mujhe chup si lag gai

ik baat bhi na ki ki nafas razdar tha

kya lutf de gaya vo fareb-e-vafa ka daur

goya kisi ke dil pe hamen e’tibar tha

duniya se rah-ravan-e-mohabbat guzar gae

is karvan ka alam-e-hasti ghubar tha

chhut kar qafas se main na gaya su-e-bostan

akhir fareb-khurda-e-fasl-e-bahar tha

ik ah-e-garm ham ne bhari thi shab-e-firaq

jal kar sahar ko khaak dil-e-be-qarar tha

fursat mili na ham ko tamasha-e-dahr ki

har zarra husn-e-yar ka aina-dar tha

ik lakht-e-dil bacha tha magar vo bhi ai ‘nazar’

akhir ko nazr-e-dida-e-khun-naba-yar tha

Leave a Comment