Anwar Minai
maḳhmali ḳhvab ka ankhon men na manzar phaila
zahr hi zahr mire jism ke andar phaila
sabz mausam men bhi ho jis ki shabahat piili
is chaman men kahin sho.ale kahin patthar phaila
ḳhaufnaki asar-andaz hua karti hai
is ko aḳhbar ki manind na ghar ghar phaila
ho ye mumkin to mire jism ke andar bhi utar
reza reza mujhe har samt barabar phaila
iḳhtira.at ke baa.is hi jahan men ab tak
na.e ehsas ka be-payan samundar phaila
vaj.h-e-taklif na ban jaa.e ḳhala ki ḳhvahish
ab uḌanon ke liye par na kabutar phaila
laakh suraj ki inayat rahen mere saath
mera saaya na mire qad ke barabar phaila
Leave a Reply