Sameena Gul
main ne kaha ke chand ki raushan misal do
us ne kaha ke aankh se chilman haTa ke dekh
main ne kaha ke raat ke anchal men kaun tha
us ne kaha ke zulf pe shabnam gira ke dekh
main ne kaha ke hijr ki shaḳhon pe phuul kyuun
us ne kaha ke diid ki ḳhushbu mila ke dekh
main ne kaha ke ret ke pahlu men kya chhupa
kahne lage ke dhuup ki chadar bichha ke dekh
main ne kaha ye mauj se dariya ka kya hua
kahne lagi ke siip ke moti men aa ke dekh
main ne kaha ke diip ke daman men kya jala
us ne kaha ke aah ko dil men daba ke dekh
Leave a Reply