main zaḳhm kha ke gira tha ki thaam us ne liya
muaaf kar ke mujhe intiqam us ne liya
main so gaya to koi niind se uTha mujh men
phir apne haath men sab intizam us ne liya
kabhi bhulaya kabhi yaad kar liya us ko
ye kaam hai to bahut mujh se kaam us ne liya
na jaane kis ko pukara gale laga ke mujhe
magar vo mera nahin tha jo naam us ne liya
bahar aa.i to phulon se un ki ḳhushbu li
hava chali to hava se ḳhiram us ne liya
fana ne kuchh nahin manga saval karte hue
isi ada pe ḳhuda se davam us ne liya
Leave a Reply