main tasht-e-khvab liye haath men guzar gai huun
samajh saka na vo jis ke liye main ghar gai huun
bahut ajab thi samundar se guftugu lekin
pahan ke pyaas palatne ka sabr kar gai huun
mira mizaj raha dasht-ashna shab bhar
ki din men bastiyan dekhin to jaise dar gai huun
husul-e-khvahish-e-nayab garche na-mumkin
kisi ke vaada-e-be-ab pe thahar gai huun
bahut nihal hai dil aankh men hai sarmasti
lage ki shahar-e-khush-anjam se guzar gai huun
bala se bhuul gae vo jo ashna the kabhi
main aaj apne shabistan men be-khatar gai huun
khusha hatheli pe yadon ka qafila thahra
khusha ki yaad thi aisi khushi se mar gai huun
bahut aziiz tha ashuftagi ka pairahan
ye jaan kar dam-e-azurdagi bikhar gai huun
sarab-asa raha vo taalluq-e-khuban
palat palat ke bulata hai phir bhi dar gai huun
Leave a Reply