main saans lete za.iif jismon men rah chuka huun
main hadisa huun udaas logon men rah chuka huun
qadim naslon ke ghar nahusat ka devta tha
jadid naslon ke zard kamron men rah chuka huun
main nim-murda asiir insan ka qahqaha huun
main surḳh inTon ke ḳhuni pinjron men rah chuka huun
main aisa sar huun jo dasht-e-ghurbat men kaT gaya tha
main sar-burida shahid lashon men rah chuka huun
main raaja gidh huun na dasht-zada na mas-ḳhora
main phir bhi basti ke murda-ḳhoron men rah chuka huun
main ism-e-azam ka mo.ajiza huun main naḳhuda huun
main chand taron men aur gharon men rah chuka huun
yaqin jaano ye mere balon men gard dekho
main shahr vaala tumhare gaanv men rah chuka huun
main yaum-e-ashur tishnagi ka sarab ban kar
ḳhalil-zadon ke ḳhali kuzon men rah chuka huun
Leave a Reply