Poet
ki tu ne lab-kusha.i to kis ke huzur ki
ab kirchiyan sameT dil-e-na-subur ki
kis ke lahhu men shaam naha kar hai surḳh-ru
kis ne chuka.i ḳhuun se qimat ghurur ki
sadiyon se kis ki qabr pe girya-kunan hai raat
leTa hai kaun oḌh ke chadar ye nuur ki
ilm-o-kamal aap ki miras kya kaha
parten na kholiye mere tahtush-shu.ur ki
taqdir jitna chahe mujhe dar-ba-dar kare
miTTi se ḳhu na ja.egi burhan-pur ki
phir ba-adab hain lafz-o-ma.ani mire huzur
phir fauj utar rahi hai ḳhayal-e-tuyur ki
tafhim an-janab ye ‘ghalib’ ka sher hai
kuchh an-kahi bata.iye bainassutur ki
ham ḳhud se ham-kalam ho.e kam nahin ‘nadim’
javen kalim sair karen koh-e-tur ki
Leave a Reply