jigar-moradabadi

Gandhi-Ji Ki Yaad Mein!

vahi hai shor-e-hae-o-hu, vahi hujum-e-mard-o-zan

magar vo husn-e-zindagi, magar vo jannat-e-vatan

vahi zamin, vahin zaman, vahi makin, vahi makan

magar surur-e-yak-dili, magar nashat-e-anjuman

vahi hai shauq-e-nau-ba-nau, vahi jamal-e-rang-rang

magar vo ismat-e-nazar, taharat-e-lab-o-dahan

taraqqiyon pe garche hain, tamaddun-o-muashrat

magar vo husn-e-sadgi, vo sadgi ka bankpan

sharab-e-nau ki mastiyan, ki al-hafiz-o-al-aman

magar vo ik latif sa surur-e-bada-e-kuhan

ye naghma-e-hayat hai ki hai ajal tarana-sanj

ye daur-e-kaenat hai ki raqs men hai ahrman

hazar-dar-hazar hain agarche rahbaran-e-mulk

magar vo pir-e-naujavan, vo ek mard-e-saf-shikan

vahi mahatma vahi shahid-e-amn-o-ashti

prem jis ki zindagi, khulus jis ka pairahan

vahi sitare hain, magar kahan vo mahtab-e-hind

vahi hai anjuman, magar kahan vo sadr-e-anjuman

More Poems

Leave a Comment