Javed Akhtar
main ḳhud bhi sochta huun ye kya mera haal hai
jis ka javab chahiye vo kya saval hai
ghar se chala to dil ke siva paas kuchh na tha
kya mujh se kho gaya hai mujhe kya malal hai
asudgi se dal ke sabhi daagh dhul ga.e
lekin vo kaise jaa.e jo shishe men baal hai
be-dast-o-pa huun aaj to ilzam kis ko duun
kal main ne hi buna tha ye mera hi jaal hai
phir koi ḳhvab dekhun koi aarzu karun
ab ai dil-e-tabah tira kya ḳhayal hai
Leave a Reply