Main Jis Jagah Bhi Rahunga Wahin Pe Aaega

maiñ jis jagah bhī rahūñgā vahīñ pe aa.egā

mirā sitāra kisī din zamīñ pe aa.egā

lakīr khīñch ke baiThī hai tishnagī mirī

bas ek zid hai ki dariyā yahīñ pe aa.egā

muhīb saa.e baḌhe aate haiñ hamārī taraf

kab e’tibār hameñ dūr-bīñ pe aa.egā

ab is adā se havā.eñ diye bujhā.eñgī

ki ittihām bhī ḳhāna-nashīñ pe aa.egā

kamān-e-vaqt ne ham ko hadaf banāyā hai

kahīñ se tiir chalegā hamīñ pe aa.egā

uḌā rahā huuñ ġhubāra magar ḳhabar hai mujhe

zarā sī der meñ vāpas zamīñ pe aa.egā

Leave a Comment