aap dil khol kar be-dad pe be-dad karen
aur ham zabt se len kaam na fariyad karen
hashr men us ki nazar ho ga.i nichi ham se
ho sake jin se vo ab shikva-e-jallad karen
kuchh to farma.iye insaf agar hai koi chiiz
aap ko dil se bhula.en to kise yaad karen
dil-e-betab sambhalta hi nahin siine men
ek mazlum ki ab aap kuchh imdad karen
aaj ik qabr pe ‘alim’ ye likha dekha tha
sakin-e-gulshan-e-hasti na mujhe yaad karen
Leave a Reply