Bushra Ejaz
miri palkon pe tabinda
tiri ankhon ke aansu
mujhe tarik raton men
nae raste sujhate hain
vajudi vahimon ki sar-zaminon par
main jab khud se bichhadti huun
chamakti ret ke zarron ki surat
jab bikharti huun
mujhe vo apne nam se jod dete hain
mujhe khud se milate hain
main jab din ki bahut lambi masafat men
udasi ki thakan se chuur hoti huun
akele-pan ki vahshat men
bahut majbur hoti huun
to gahri hanpti shamon ki dahlizon se
vo akasr mujhe dhire se
maan! kah kar bulate hain
tiri ankhon ke aansu
mujhe kaise anokhe silsilon se
ja milate hain!!
Leave a Reply