Adeem Hashmi
main guftugu huun ki tahrir ke jahan men huun
mujhe samajh to sahi main tiri zaban men huun
khud apni saans ki rukti hai apne chalne se
ye kya ghutan hai main kis tang se makan men huun
jila raha hai mare jism ko mira hi kamal
main ek tiir huun tuuti hui kaman men huun
guzar rahi hai mare sar se gahakon ki nigah
zara si chiiz huun lekin badi dukan men huun
mire qarib se guzra nahin hai sang-tarash
mujassama huun main ab tak magar chatan men huun
mujhi men guunj rahi hai mire sukhan ki sada
nava-e-garm huun main dasht-e-be-zaban men huun
‘adim’ baitha hua huun paron ke dher pe main
khush is tarah huun ki jaise kisi udaan men huun
Leave a Reply