Poet
main bura hi sahi bhala na sahi
par tiri kaun si jafa na sahi
dard-e-dil ham to un se kah guzre
gar unhon ne nahin suna na sahi
shab-e-gham men bala se shaghl to hai
nala-e-dil mira rasa na sahi
dil bhi apna nahin raha na rahe
ye bhi ai charkh-e-fitna-za na sahi
dekh to lenge vo agar aae
taqat-e-arz-e-muddaa na sahi
kuchh to ashiq se chhed-chhad rahi
kaj-adai sahi ada na sahi
kyuun bura mante ho shikva mira
chalo beja sahi ba-ja na sahi
uqda-e-dil hamara ya qismat
na khula tujh se ai saba na sahi
vaizo banda-e-khuda to hai ‘aish’
ham ne maana vo parsa na sahi
Leave a Reply