main baat kaun se pairaya-e-bayan men karun
jo sochta huun use kis zaban men likhun
katar diye hain zamane ne pankh khvabon ke
bhara hai saghar-e-hasrat men arzuon ka khuun
nahin hai kushta-e-khuban ka khun-baha koi
ai ahl-e-shauq na khaao fareb harf-e-fusun
kabhi hai chand ka haala naqab-e-lala kabhi
anile rang dikhati hai zulf-e-ghaliya-gun
zamam-e-rahila-e-dil khirad ke haath men do
ki marti hai havas is navah men shab-khun
ab is ko khana-kharabi kaho ki mamuri
zamin men saath khazane ke dhans gaya qarun
banu-tamim ho tum main salama-bin-jindal
bila-javaz tumhari sana main kaise karun
parindgan-e-bayaban karen vasila jise
main us amiin ke khirman ke khosha-chinon men huun
shahid-e-ilm bhi huun zinda-e-mohabbat bhi
ba-faiz-e-zauq-e-salim-o-tabiat-e-mauzun
sharik-e-zumra-e-mehnat-kashan hai shair bhi
baha-e-sad-nafas-e-khun-chakan hai ik mazmun
anadi-pan na kaho meri sada-lauhi ko
huun nau-niyaz magar kuhna-mashq-e-jazb-o-junun
bala-e-jabr bhi hai pa-e-ikhtiyar bhi hai
qusur-var huun main ya sada-e-kun-fayakun
dara-e-farra-e-farhang dekho rang-e-sukhan
abul-kalam nahin main abul-maani huun
Leave a Reply