Wafa Naqvi
main apni zaat ki tafsir karne vaala kaun
main ek ḳhvab huun ta.abir karne vaala kaun
likhi hui hai jo dil ki zaban men dhaḌkan par
main is kitab ko tahrir karne vaala kaun
abhi to qaid se nikla huun un nigahon ki
main phir ḳhayal ko zanjir karne vaala kaun
main apne-ap ko jitun yahi munasib hai
main mumkinat ko tasḳhir karne vaala kaun
mujhe aziiz hai din ki masafaton ka shu.ur
main ek raat ki ta.amir karne vaala kaun
mire vajud ke sahra ka kab taqaza hai
main apni pyaas ko tasvir karne vaala kaun
jahan lahu ki sama.at ho sang-e-ḳhamoshi
main is maqam pe taqrir karne vaala kaun
Leave a Reply