Ajiz Matvi
mai-ḳhane par kaale badal jab ghir ghir kar aate hain
ham bhi ankhon ke paimane bhar bhar kar chhalkate hain
main jin ko apna kahta huun kab vo mire kaam aate hain
ye saara sansar hai sapna sab jhuTe rishte-nate hain
tanhai ke bojhal lamhe ham is tarah bitate hain
dil ham ko deta hai tasalli ham dil ko samjhate hain
jivan ki gutthi ka sulajhna kaam hai ik na-mumkin sa
girhen paḌti hi jaati hain ham jitna suljhate hain
un ki qismat men jalna hai kaun un se kahta hai jalen
parvane dipak par aa kar apne-ap jal jaate hain
jivan biita lekin ab tak main na samajh paaya ye bhed
biite dinon ki yaad aate hi aansu kyuun bhar aate hain
vo jab apna sar dhakte hain khul jaate hain un ke pair
jo apni chadar se ziyada pair apne phailate hain
hota hai mahsus ye ‘ajiz’ shayad us ne dastak di
tez hava ke jhonke jab darvaze se Takrate hain
Leave a Reply