Mahfil Se Uthane Ke Saza-War Hamin The

Taashshuq Lakhnavi

mahfil se uthane ke saza-var hamin the

sab phuul tire baagh the ik khaar hamin the

ham kis ko dikhate shab-e-furqat ki udasi

sab khvab men the raat ko bedar hamin the

sauda tiri zulfon ka gaya saath hamare

mar kar bhi na chhute vo giraftar hamin the

kal raat ko dekha tha jise khvab men tum ne

rukhsar pe rakkhe hue rukhsar hamin the

dil-sokhta the chahne valon men tumhare

lekin sabab-e-garmi-e-bazar hamin the

kal kucha-e-qatil men jo tha khalq ka majmaa

khaae hue us haath ki talvar hamin the

ai ishq-e-mizha kaun hamen dekhne aata

ankhon men khatakte the vo bimar hamin the

turbat men bhi ankhen na huiin band hamari

aise tire ik talib-e-didar hamin the

thande kiye ghairon ke dil aur ham ko jalaya

ik the to mohabbat ke gunahgar hamin the

milte hi lab-e-yar se lab dil nikal aaya

maara jise iisa ne vo bimar hamin the

tum ghairon se dar dar ke lipat jaate the paiham

kal raat ko nalan pas-e-divar hamin the

sab raaz taashshuq” se bayan hote the dil ke

pahle tire ik mahram-e-asrar hamin the