Manzoor Hashmi
luTa diye the kabhi jo ḳhazane DhunDhte hain
na.e zamane men kuchh din purane DhunDhte hain
kabhi kabhi to ye lagta hai main vo lamha huun
ki ik zamane se jis ko zamane DhunDhte hain
kuchh ehtiyat bhi ab ke talab men rakhna paḌi
sau us ko aur kisi ke bahane DhunDhte hain
lapak ke aate hain siine ki samt tiir aise
parind shaḳh pe jaise Thikane DhunDhte hain
hamari sada-mizaji bhi kya qayamat hai
ki ab qafas hi men ham ashiyane DhunDhte hain
Leave a Reply