luT ga.e ahl-e-gham jal ga.e ashiyan barq ka tilmilana ghazab ho gaya
jin ke aane ki mangi thi barson dua un baharon ka aana ghazab ho gaya
fikr-e-hasti ga.i fikr-e-duniya ga.i asman ke gile gham ki bipta ga.i
ho ga.e gul sabhi jagmagate diye sham-e-ulfat jalana ghazab ho gaya
aankh pur-ab maghmum hai zindagi dil hai betab ankhon se niind uḌ ga.i
un ki mahfil men jaana to mushkil na tha un ki mahfil se aana ghazab ho gaya
samne se mire jab bhi jaate hain vo ruḳh bachate hain nazren churate hain vo
pyaar un se jatana sitam ho gaya raaz dil ka batana ghazab ho gaya
chand sharma gaya phuul qurban hue husn-e-kaun-o-makan aa gaya vajd men
‘shauq’ ko dekh kar bazm men aap ka zer-e-lab muskurana ghazab ho gaya
Leave a Reply