Sufi

Log Jam-O-Subu Mein Khoe Rahe

log jam-o-subu men khoe rahe

ham tiri aarzu men khoe rahe

zindagi ki thi justuju ham ko

umr bhar justuju men khoe rahe

mahfil-e-rang-o-bu to mil na saki

khvahish-e-rang-o-bu men khoe rahe

ashk jo bach rahe the ankhon men

hurmat-e-abru men khoe rahe

har taraf tha hisar kanton ka

phuul fikr-e-numu men khoe rahe

kya tasavvur tha chashm-e-saqi ka

raat bhar ham subu men khoe rahe

shauq-e-avargi na puchh ‘ziya’

lazzat-e-ku-ba-ku men khoe rahe

More Poems

Leave a Comment