liya na haath se jis ne salam ashiq ka
vo kaan dhar ke sune kya payam ashiq ka
qusur-e-shaikh hai firdaus o huur ki khvahish
tiri gali men hai pyare maqam ashiq ka
ghurur-e-husn na kar jazba-e-zulekha dekh
kiya hai ishq ne yusuf ghulam ashiq ka
tire hi naam ki simran hai mujh ko aur tasbih
tu hi hai vird har ik subh-o-sham ashiq ka
vafur-e-ishq ko ashiq hi janta hai ‘nasir’
har ik samajh nahin sakta kalam ashiq ka
Leave a Reply