Alka Mishra
lau mire dil ne zara us se laga.i hi nahin
main ne chahat ki kabhi jot jaga.i hi nahin
raushni ruuh tak aa.i hai to aa.i kaise
jab ki us tak to miri koi rasa.i hi nahin
apni rau men huun bahe jaati huun naddi ki tarah
pattharon ko main kabhi dhyan men laa.i hi nahin
kaise ban jaate hain sab kaam ye bigḌe mere
ek neki to abhi main ne kama.i hi nahin
ḳhud-ba-ḳhud jhuk ga.iin dar par tire nazren meri
ye nigah main ne kahin aur jhuka.i hi nahin
kaise chup-chap chale aate hain nindon men miri
main ne ḳhvabon ko to avaz laga.i hi nahin
us ki ummid abhi se main laga luun kaise
apni hasti to abhi main ne miTa.i hi nahin
Leave a Reply