Jahanzeb Sahir
lamhon men ek umr ki mehnat ḳharab ki
is dhuup ne makan ki rangat ḳharab ki
raste men phuul dekh ke ham log Dar ga.e
kis ne hamare paanv ki aadat ḳharab ki
ujlat-pasand haath men aa.e hue the ham
kuchh gahakon ne puchh ke qimat ḳharab ki
ya.ani main us ke ba.ad bhi ḳhush huun ye soch kar
kamre ki jan-bujh ke halat ḳharab ki
vaise ye ishq kaun sa likkha tha baḳht men
ham ne to apni aap hi qismat ḳharab ki
kis ne hamare naam pe beche hain qahqahe
kis ne hamare naam ki shohrat ḳharab ki
tang aa ke asman se nikala gaya hamen
thoḌi bahut jo thi yahan vaq.at ḳharab ki
‘sahir’ junun-e-shauq men kya kya nahin kiya
miTTi palid ki kabhi izzat ḳharab ki
Leave a Reply