Nuzhat Abbasi
lamhe shumar zaat bhi karne nahin diye
puure ye vajibat bhi karne nahin diye
pesh-e-nazar hain apne muqaddar ki talḳhiyan
un se mutalibat bhi karne nahin diye
badle jo harf lafz ke ma.ani badal ga.e
mahfuz vaqi.at bhi karne nahin diye
duniya ke sanehat ne dil ko rula diya
tahrir hadsat bhi karne nahin diye
mausam na.e the dil ke kanval kyuun na khul sake
kuchh ahd-e-iltifat bhi karne nahin diye
milti koi kalid hi irfan-e-zat ki
duniya ne tajrabat bhi karne nahin diye
Leave a Reply