lamha-e-takhliq bakhsha us ne mujh ko bhiik men
main ne lautaya use ik nazm ki taknik men
bam-o-dar ki raushni phir kyuun bulati hai mujhe
main nikal aaya tha ghar se ik shab-e-tarik men
faisle mahfuz hain aur fasle hain barqarar
gard udti hai yaqin ki vadi-e-tashkik men
si ke phaila duun bisat-e-fan pe main daman-e-chak
dor to guzre nazar ki sozan-e-barik men
main ziyarat-gah-e-agahi se laut aaya huun dost
phuul laaya huun alam ke hadiya-e-tabrik men
bol mere sur ko chhute chhute rah jaate hain ‘saz’
aah ye kaisi kasar hai dard ki tahrik men
Leave a Reply