lambi ḳhamoshi ki sazish ko hara.e koi
meri avaz men avaz mila.e koi
main bhi uḌ sakta huun akash ko chhu sakta huun
mera soya hua ehsas jaga.e koi
koi to hoga mujhe DhunDne vaala yaaro
mera gumnam pata sab ko bata.e koi
aisa lagta ki sab bhuul ga.e hain mujh ko
mere darvaze pe avaz laga.e koi
har taraf sirf sarab aur sarab aur sarab
kab tak ankhon se bhala pyaas bujha.e koi
sach hai main ne hi ḳhamoshi ki guzarish ki thi
ab miri gum-shuda avaz to lauTa.e koi
jis ko sun kar mire darvaze pe lag jaa.e hujum
is tarah ki koi afvah uḌaa.e koi
Leave a Reply