Anjum Irfani
lahje ka ras hansi ki dhanak chhoḌ kar gaya
vo jaate jaate dil men kasak chhoḌ kar gaya
mauj-e-hava-e-gul sa vo guzra tha ek baar
phir bhi masham-e-jan men mahak chhoḌ kar gaya
aaya tha pichhli raat dabe paanv mere ghar
pazeb ki ragon men jhanak chhoḌ kar gaya
larza giraft-e-lams ki lazzat se baar baar
banhon men shaḳh-e-gul ki lachak chhoḌ kar gaya
aaya tha shahr-e-gul se bulava mire liye
zindan men beḌiyon ki chhanak chhoḌ kar gaya
tha dekhna kuchh apna tilism-e-hunar use
bagh-e-bahisht o huur o malak chhoḌ kar gaya
avara ku-ba-ku ye use DhunDhti phire
pa-e-hava men kaisi sanak chhoḌ kar gaya
hanste the zaḳhm aur bhi kha kha ke zarb-e-sang
rahon men phuul duur talak chhoḌ kar gaya
hathon men de ke khinch liin resham-kala.iyan
kamre men chuḌiyon ki khanak chhoḌ kar gaya
ankhen na us ki bar-e-nadamat se uTh sakin
zaḳhmon pe mere aur namak chhoḌ kar gaya
palkon pe jugnuon ka basera hai vaqt-e-sham
‘anjum’ main paniyon men chamak chhoḌ kar gaya
Leave a Reply