Saif Zulfi
lahje ka rang lafz ki ḳhushbu bhi dekh le
aa mujh se kar kalam mujhe tu bhi dekh le
main chaudhvin ka chand samundar tira badan
meri kashish ka bolta jaadu bhi dekh le
khulta huun tere ruḳh ki sajal chandni ke paas
pahchan le mujhe miri ḳhushbu bhi dekh le
tu ḳhar-zar aur main abr-e-barhana-pa
mere safar ka karb kabhi tu bhi dekh le
ik shab rida-e-abr se bahar nikal ke aa
kis kis ko hai nigah pe qaabu bhi dekh le
mere lahu ki gunjti fariyad par na ja
ankhon men apni tairte aansu bhi dekh le
manzil pe sirf chalte hue chand hi na dekh
chamke kahin jo raah men jugnu bhi dekh le
dast-e-saba ki Theri hui loriyon se bach
dasht-e-vafa men chalti hui lu bhi dekh le
ghere men asman ne tujhe le liya to kya
is daam se farar ka pahlu bhi dekh le
sachcha.i ka alam tu uThata to hai magar
kaTte hain is jihad men baazu bhi dekh le
barham hai roz-o-shab ka mizaj-e-sukun-pasand
bikhra diye hain vaqt ne gesu bhi dekh le
gunjan paniyon pe barasne se fa.eda
ai abr tishnagan-e-lab-e-ju bhi dekh le
‘zulfi’ jo mere tarz-e-ada ka asiir hai
vo kaash mere sher ka jaadu bhi dekh le
Leave a Reply