Qamar Jalalvi
lahad aur hashr men ye farq kam paa.e nahin jaate
yahan dhuup aa nahin sakti vahan saa.e nahin jaate
kisi mahfil men bhi aise chalan paa.e nahin jaate
ki bulva.e hue mehman uThva.e nahin jaate
zamin par pa.un rakhne de unhen ai naz-e-yakta.i
ki ab naqsh-e-qadam un ke kahin paa.e nahin jaate
tujhe ai dida-e-tar fikr kyuun hai dil ke zaḳhmon ki
ki be-shabnam ke bhi ye phuul murjha.e nahin jaate
junun valon ko kya samjhaoge ye vo zamana hai
ḳhirad vaale ḳhirad valon se samjha.e nahin jaate
vaqar-e-ishq yuun bhi sham.a ki nazron men kuchh kam hai
patinge ḳhud chale aate hain bulva.e nahin jaate
fazilat hai ye insan ki vahan tak ja pahunchta hai
farishte kya farishton ke jahan saa.e nahin jaate
bas itni baat par chhini ga.i hai rahbari ham se
ki ham se karvan manzil pe luTva.e nahin jaate
‘qamar’ ki sub.h-e-furqat puchhiye suraj ki kirnon se
sitare to gavahi ke liye aa.e nahin jaate
Leave a Reply