lafzon men ik nae safar ka karta hai aghaz badan
nuqta nuqta phail ke mujh ko deta hai avaz badan
har-pal tuut bikharna khadsha thes lage to kaanp uthta hai
shisha shisha ruup liye hai patthar ka dam-saz badan
udta badal dhalti chhaya ik ik pal men sau sau kaaya
udte roz-o-shab se aage karta hai parvaz badan
anjani an-dekhi sadaen aksar dastak de jaati hain
mujh ko barahna kar deta hai aksar ye ghammaz badan
kitne hatim bhatke barson lauh-e-tilism-e-raz liye
phir bhi ik asrar ka sahra phir bhi hai ik raaz badan
ik ik taar nafas se ab tak lipti hai us lams ki khushbu
ik din shayad takraya tha mujh se koi shahnaz badan
Leave a Reply