tumhari be-ada.i ke maze aane lage mujh ko
jo mere dushman-e-jan the vo samjhane lage mujh ko
tiri furqat men halat ho ga.i hai aaj vo meri
ye mere chara-gar zanjir pahnane lage mujh ko
ḳhudaya dekh kar un ko mujhe tujh par yaqin aaya
unhin men to tire jalve nazar aane lage mujh ko
diye ashkon ke palkon ki munDeron par hue raushan
kabhi jo sham-e-hijran aap yaad aane lage mujh ko
natija dil ke samjhane ka nikle bhi to kya nikle
use samjhane jo baiThun vo samjhane lage mujh ko
na jin ke jism par sar hai na chehra hai na ankhen hain
qayamat hai vahi a.ina dikhlane lage mujh ko
jo patthar phenkne valon ko main ne ghaur se dekha
bahut se log un men jaane pahchane lage mujh ko
Leave a Reply