lafz gunge hain unhen sho.ala-bayani de de
misl-e-sarsar mire ḳhame ko ravani de de
phir vahi jhuuT ka lashkar hai mire charon taraf
phir mujhe hausla-e-sidq-e-bayani de de
mere gulshan ki taraf bhej koi abr-e-bahar
honT sukhe hain gulon ke inhen paani de de
zindagani miri be-kaif hui jaati hai
koi kirdar naya koi kahani de de
meri har shaam hui sham-e-ghariban jaisi
meri qismat men to ik shaam suhani de de
tere bandon pe zamin saḳht hui jaati hai
ai ḳhuda in ke liye ja-e-amani de de
jis ko bachpan na mila ho use bachpan ho ata
qabl-az-vaqt buzurgon ko javani de de
jo tiri zaat ke munkir hain mire rabb-e-karim
apne hone ki unhen taaza nishani de de
is ḳharabe men kisi tarah nahin lagta dil
phir mujhe hausla-e-naql-e-makani de de
Leave a Reply