lab-e-ḳhamosh ko arman-e-guftugu hi sahi
jigar men hausla-e-arz-e-arzu hi sahi
asar qubul hai mujh ko badalti qadron ka
rag-e-hayat men aslaf ka lahu hi sahi
namaz-e-ishq ada ho rahi hai maqtal men
ye pur-ḳhulus ibadat hai be-vuzu hi sahi
use bhi ḳhauf hai gulshan men zard mausam ka
vo surḳh phuul ki manind sho.ala-ru hi sahi
junun-e-ishq ke lashkar se haar ja.egi
sipah-e-hosh-o-ḳhirad laakh jang-ju hi sahi
vo meri tishnagi-e-dil bujha nahin sakta
khanakta jaam chhalakta hua subu hi sahi
main ek harf-e-malamat huun us ke daman par
vo meri paak mohabbat ki aabru hi sahi
miri nigah ka markaz nahin to kuchh bhi nahin
vo ḳhud-pasand nigahon men ḳhub-ru hi sahi
‘saba’ ki sha.ir-e-ḳhush-fikr hai magar gumnam
har ek us se hai vaqif vo ḳhush-gulu hi sahi
Leave a Reply