kyuun na rah paa.e is jahan se pare
aur bhi the jahan yahan se pare
ham jahan paas tere aa baiThe
tu uTha ho gaya vahan se pare
talḳhiyan aur baḌh ga.iin dil ki
jab huiin talḳhiyan zaban se pare
ye jo tu meri rah men haa.il hai
jaane kab hoga darmiyan se pare
main to apne bhi as-pas nahin
aur ho ja.un main kahan se pare
mujh pe saaya na Daliye apna
mujh ko rahna hai sa.eban se pare
ishq vo mar-e-astin jis ka
zahr utra hai jism-o-jan se pare
maar kar Daal de jo chhanv men
ham bhale aise mehrban se pare
yuun to viran hai ashiyan bhi magar
ḳhaak uḌa.enge ashiyan se pare
ham jo kaasa uTha.e aa baiThe
ab karo ham ko astan se pare
Leave a Reply