kyuun baiTh ga.e ghubar se ham
kuchh kah na sake bahar se ham
ye zindagi umr bhar ka rona
ghabra ga.e intizar se ham
vo jabr ki lazzaton ka aalam
baaz aa.e is iḳhtiyar se ham
hanste hain ki hans sake zamana
ḳhush hain to is e’tibar se ham
yuun bhi to sukun mila hai barson
phirte rahe be-qarar se ham
vo lamha hai aaj tak gurezan
jab tum se the ham-kanar se ham
ab aḳhir-e-shab ‘nazar’ hai shayad
phir jaise hain hoshiyar se ham
Leave a Reply