Abdul Rahman Khan Wasfi Bahraichi
kya kya supurd-e-khak hue namvar tamam
ik roz sab ko karna hai apna safar tamam
meri nazar ne luut liye jalva-ha-e-husn
hasrat se dekhte hi rahe dida-var tamam
tum ne to apna kah ke mujhe luut hi liya
matam-kunan hai mere liye ghar ka ghar tamam
maana ki mere lab na hile roab-e-husn se
rudad-e-dil to kah hi gai chashm-e-tar tamam
ab didani hai aap ke bimar-e-gham ka haal
mayus aa rahe hain nazar chara-gar tamam
rah-e-vafa men had se ham aage guzar gae
do-gam chal ke baith gae rahbar tamam
chhode hain ham ne naqsh-e-mohabbat har ik jagah
vaqif hamare haal se hain bam-o-dar tamam
Leave a Reply