Sufi
kya kahun jazbat ka tufan kitna tez hai
dil ba-hadd-e-be-ḳhudi ehsas se labrez hai
ishq ki duniya men har taklif rahat-ḳhez hai
iztirab-e-dil bhi ik had tak sukun-amez hai
didani hai ab shikast-e-zabt ki be-chargi
muskurata huun magar dil dard se labrez hai
dil nigah-e-naz ke uThne se pahle uTh gaya
mere ehsasat ki raftar kitni tez hai
aankh men aansu jigar men dard dil men iztirab
aah zabt-e-ah bhi kitna talatum-ḳhez hai
ishq ki sada-dili hai har taraf chhai hui
bargah-e-husn men har aarzu nau-ḳhez hai
Leave a Reply